ಹೆಂಡಗುಡುಕ ಪ್ರಾಣಿ ಪೆನ್ ಟೇಲ್ಡ್ ಟ್ರೀ ಶ್ರೂ!

ಮನುಷ್ಯರಂತೆ ಪ್ರಾಣಿಯೂ ಹೆಂಡ ಕುಡಿಯುತ್ತೆ. ಜಗತ್ತಿನಲ್ಲಿಯೇ ಮಹಾನ್ ಹೆಂಡಗುಡುಕನೆಂಬ ಬಿರುದನ್ನೂ ಸಹ ಪಡೆದುಕೊಂಡಿದೆ. ಈ ಹೆಂಡಗುಡುಕನ ಹೆಸರು ಪೆನ್ ಟೇಲ್ಡ್ ಟ್ರೀ ಶ್ರೂ! ಇದರೊಂದಿಗೆ ಪೈಪೋಟಿಗೆ ನಿಂತರೆ ಮನುಷ್ಯರು ಕೂಡಾ ಹಿಂದೆ ಬೀಳುವುದು ಖಂಡಿತ. ಇಲಿಯ ಆಕಾರದ ಈ ಸಸ್ತನಿಗೆ ರಾತ್ರಿಯ ಹೊತ್ತು ಹೆಂಡ ಕುಡಿಯದೇ ನಿದ್ದೆಯೇ ಬರುವುದಿಲ್ಲವಂತೆ. 

ದೇವರು ಮಾಡಿದ ಬಾರು!
ಪ್ರತಿದಿನ ಕನಿಷ್ಠವೆಂದರೂ ಎರಡು ತಾಸನ್ನು ಹೆಂಡ ಕುಡಿಯುವುದಕ್ಕೆ ಮೀಸಲಿಡುತ್ತವೆ ಪೆನ್ ಟೇಲ್ಡ್ ಟ್ರೀ ಶ್ರೂ. ಹಾಗಂತ ಇವು ಬಿಯರ್ ಬಾಟಲಿಗೆ ಕೈ ಹಾಕುವುದಿಲ್ಲ. ಇವುಗಳಿಗಾಗಿ ದೇವರೇ ಬಾರನ್ನು ನಿರ್ಮಿಸಿಕೊಟ್ಟಿದ್ದಾನೆ! ಬೆರ್ಟೆಮ್ ಜಾತಿಯ ತಾಳೆ ಮರಗಳಲ್ಲಿ ನೈಸರ್ಗಿಕವಾಗಿ ಮಕರಂದದ ರೂಪದಲ್ಲಿ ಮದ್ಯ ಶೇಖರಣೆಗೊಂಡಿರುತ್ತದೆ. ಟ್ರೀ ಶ್ರೂ ರಾತ್ರಿಯಾಗುತ್ತಿದಂತೆ ತಾಳೆಮರಗಳ ಮೊಗ್ಗಿನಲ್ಲಿ ಅಡಗಿರುವ ಮದ್ಯ ಹೀರಲು ಶುರುಹಚ್ಚಿಕೊಳ್ಳುತ್ತವೆ. ಈ ತಾಳೆ ಮರಗಳ ಹೂವಿನ ಮಕರಂದ 8.3ರಷ್ಟು ಮದ್ಯದ ತಾಕತ್ತು ಹೊಂದಿರುತ್ತದೆ. ಅಂದರೆ ಇದರ ಪ್ರಮಾಣ ಅನೇಕ ಬಿಯರ್ ಬಾಟಲಿಗೆ ಸಮ. ಮನುಷ್ಯ ಕಂಟಗಟ್ಟಲೆ ಕುಡಿಯುವಷ್ಟೇ ಮದ್ಯವನ್ನು ಇವು ಕೂಡಾ ಸೇವಿಸುತ್ತವೆ. ಆದರೆ ಬಾಟಲಿಯ ಲೆಕ್ಕದಲ್ಲಿ ಅಲ್ಲ. ಎಷ್ಟೇ ಹೆಂಡ ಕುಡಿದರೂ ಟ್ರೀ ಶ್ರೂಗಳಳಿಗೆ ಅಮಲು ಏರುವದೇ ಇಲ್ಲ. ಮನುಷ್ಯರಿಗಿಂತಲೂ ಹೆಚ್ಚಿನ ಪ್ರಮಾಣದಲ್ಲಿ ಮದ್ಯ ಜೀರ್ಣಿಸಿಕಕೊಳ್ಳುವ ತಾಕತ್ತು ಟ್ರೀ ಶ್ರೂಗಳಿಗೆ ಇದೆ. ಪ್ರತಿದಿನ ರಾತ್ರಿ ಕನಿಷ್ಠವೆಂದರೂ 12 ಗ್ಲಾಸಿನಷ್ಟು ವೈನ್ ಗಳನ್ನು ತಾಳೆ ಮರದಿಂದ ಹೀರುತ್ತವೆ. ಹೀಗೆ ಮದ್ಯಪಾನ ಮಾಡಿದಾಗ ಇವು ತಮ್ಮ ತೂಕ ಹೆಚ್ಚಿಸಿಕೊಳ್ಳುತ್ತದೆ.

ಶಾಯಿ ಪೆನ್ನಿನ ಆಕಾರದ ಬಾಲ
ಈ ವಿಶಿಷ್ಟ ಹೆಂಡಗುಡುಕ ಪ್ರಾಣಿಯನ್ನು ಇಂಡೋನೇಷಿಯಾ, ಮಲೆಷಿಯಾ ಮತ್ತು ಥೈಲ್ಯಾಂಡ್ ನ ಅರಣ್ಯಗಳಲ್ಲಿ ಕಾಣಬಹುದಾಗಿದೆ. ಇವು ಹಳೆಯ ಸ್ಕಾಂಡೆಂಟಿಯಾ ಪ್ರಭೇದಕ್ಕೆ ಸೇರಿದೆ. ಇದರಲ್ಲಿ ಸುಮಾರು 20 ಜಾತಿಗಳಿವೆ. ಇವು ಹೆಚ್ಚಿನ ಪ್ರಮಾಣದಲ್ಲಿ ನೀರು ಕುಡಿಯುತ್ತವೆ. ನದಿ ಕೆರೆಗಳು ಕಂಡರೆ ಪದೇ ಪದೇ ಸ್ನಾನ ಮಾಡುತ್ತವೆ. ದೇಹಕ್ಕಿಂತಲೂ ದೊಡ್ಡದಾಗಿರುವ ಇದರ ಬಾಲ 7 ವರೆ ಇಂಚಿನಷ್ಟು  ಉದ್ದವಾಗಿರುತ್ತದೆ. ಇದರ ಬಾಲ ಹಿಂದಿನ ಕಾಲದಲ್ಲಿ ಬಳಸುತ್ತಿದ್ದ ಶಾಯಿಬಾಟಲಿಯಲ್ಲಿ ಅದ್ದಿದ ಗರಿಗಳುಳ್ಳ ಲೇಖನಿಯ ರೀತಿಯಲ್ಲಿ ಇರುವುದರಿಂದ ಪೆನ್ ಟೇಲ್ಡ್ ಎನ್ನುವ ಹೆಸರು ಬಂದಿದೆ. ಅದೇರೀತಿ ಮರಗಳಮೇಲೆಯೇ ಹೆಚ್ಚಾಗಿ ವಾಸಮಾಡುವುದರಿಂದ ಟ್ರೀ ಶ್ರೂ ಎಂದು ಕರೆಸಿಕೊಂಡಿದೆ. ಚೋಟುದ್ದ ಇರುವ ಇದಕ್ಕೆ ಮಾರುದ್ದದ ಬಾಲ ಯಾತಕ್ಕೆ ಎಂದು ಕೇಳಬೇಡಿ. ಬಾಲದಿಂದಲೂ ಉಪಯೋಗವಿದೆ. ಟ್ರೀ ಶ್ರೂ ಮರ ಹತ್ತುವುದರಲ್ಲಿ ಭಲೇ ನಿಪುಣ. ಉದ್ದನೆಯ ಬಾಲವನ್ನು ಬೆಲೆನ್ಸ್ ಮಾಡುತ್ತಾ ಎಂಥಾ ಮರವನ್ನಾದರೂ ಹತ್ತಿ ಹೆಂಡ ಕುಡಿಯುತ್ತದೆ.

ಹೆಂಡ ಹೀರಲು ಮರಗಳೇ ಸಿಗುತ್ತಿಲ್ಲ
ಬರಿ ಹೆಂಡ ಕುಡಿಯುವುದರಿಂದ ಇದರ ಹೊಟ್ಟೆ ತುಂಬುವುದಿಲ್ಲ. ಹೀಗಾಗಿ ಕೀಟ, ಇಲಿ, ಸಣ್ಣಹಕ್ಕಿ, ಹಲ್ಲಿಗಳನ್ನೂ ಇವು ತಿನ್ನುತ್ತವೆ. ಇವು ಹೆಚ್ಚಾಗಿ ಗುಂಪಾಗಿ ವಾಸಿಸುತ್ತವೆ. ತಮಗೆ ಅಪಾಯ ಎದುರಾಗಿದೆ ಎಂದು ಗೊತ್ತಾದ ಕೂಡಲೇ ತಮ್ಮೊಳಗೇ ಜಗಳವಾಡಿಕೊಳ್ಳುತ್ತವೆ.  ಇವುಗಳ ದೃಷ್ಟಿ, ಕೇಳಿಸಿಕೊಳ್ಳುವ ಮತ್ತು ವಾಸನೆ ಗ್ರಹಿಸುವ ಸಾಮರ್ಥ್ಯ ಅತ್ಯುತ್ತಮವಾಗಿದೆ. ಇವುಗಳ ತಲೆ ಮತ್ತು ದೇಹ ಸುಮಾರು 20 ಸೆಂ.ಮೀ ನಷ್ಟು ದೊಡ್ಡದಾಗಿರುತ್ತದೆ. ಆವಾಸ ಸ್ಥಾನಗಳ ನಾಶ ಮತ್ತು ಅರಣ್ಯ ನಾಶದಿಂದಾಗಿ ಇಂದು ಈ ವಿಶಿಷ್ಟ ಪ್ರಾಣಿ ಅಳಿವಿನ ಅಂಚಿನಲ್ಲಿದೆ. ಇವು ತಮ್ಮ ದಿನಿತ್ಯದ ಚಟುವಟಿಕೆಯಾದ ಹೆಂಡ ಹೀರುವುದಕ್ಕೆ ಮರಗಳೇ ಸಿಗದೆ ಚಡಪಸುತ್ತಿವೆ.

 

ಕಣ್ಣಿಗೆ ಕಾಣದ ಪರಾಕ್ರಮಿ!

ಬಾಹ್ಯಾಕಾಶದಲ್ಲಿ ಬದುಕಬಲ್ಲ, ಎಂಥಹ  ವಿಷಮ ಪರಿಸ್ಥಿತಿಯಲ್ಲೂ ಜೀವಿಸಬಲ್ಲ ಜೀವಿ ಇದೆಯೇ? ಜಿರಳೆಗಳು ಅಣು ಸ್ಫೋಟವನ್ನೂ ಸಹಿಸಬಲ್ಲವು ಎಂಬ ಮಾತಿದೆ.  ಆದರೆ, ಅವುಗಳನ್ನೂ ಮೀರಿಸುವ ವಿಚಿತ್ರ ಪ್ರಾಣಿಯೊಂದರ ಬಗ್ಗೆ ನಿಮಗೆ ಗೊತ್ತೇ? ಹೌದು, ಹೀಗೊಂದು ಜೀವಿ ಇದೆ. ಇದು ಜಗತ್ತಿನ ಅತ್ಯಂತ ಸುರಕ್ಷಿತ ಜೀವಿ ಎಂದೇ ಪರಿಗಣಿಸಲ್ಪಟ್ಟಿದೆ. ಬಹುಶಃ ಯಾರೂ ಇದನ್ನು ನೋಡಿರಲಾರರು, ಕೈಯಲ್ಲಿ ಮುಟ್ಟಿರಲಾರರು ಅಥವಾ  ಇದರ ಪರಿಚಯವೇ ಇಲ್ಲದೇ ಇರಬಹುದು. ನಿಸರ್ಗದಲ್ಲಿ ಅತ್ಯಧಿಕ ವರ್ಷ ಬದುಕುವ ಏಕೈಕ ಪ್ರಾಣಿ ಎನ್ನುವ ಹೆಗ್ಗಳಿಕೆಯೂ ಇದಕ್ಕಿದೆ. ಈ ಜೀವಿಯೇ ಟಾಡ್ರಿಗೇಟ್ ಅಥವಾ ಜಲ ಕರಡಿ! 

ಮೈಕ್ರೋಸ್ಕೋಪ್ ನಿಂದಲೇ ನೋಡಬೇಕು!
 ಇದೊಂದು ಸೂಕ್ಷ್ಮ ಜೀವಿ. ಇದರ ಗಾತ್ರ ಕೇವಲ 0.3 ಮಿಲಿ ಮೀಟರ್ನಿಂದ 0.5 ಮಿಲಿ ಮೀಟರ್. ಮೈಕ್ರೊಸ್ಕೋಪ್ ಬಳಸಿಯೇ ಇದನ್ನು ನೋಡಬೇಕು. ಎಂತದ್ದೇ ಕಠಿಣ ಪರಿಸ್ಥಿತಿಯಲ್ಲೂ ಆನಂದದಿಂದ ಜೀವಿಸುವ ಪ್ರಾಣಿಯೊಂದು ಭೂಮಿಯ ಮೇಲೆ ಇದ್ದರೆ ಅದು ಜಲಕರಡಿ ಮಾತ್ರ. ಈ ವಿಚಿತ್ರ ಜೀವಿಯನ್ನು ಗೊಟ್ಜ್ ಎಂಬ ವಿಜ್ಞಾನಿ 1773ರಲ್ಲಿ ಕಂಡುಹಿಡಿದ. 

ಬಾಹ್ಯಾಕಾಶದಲ್ಲಿಯೂ ಬದುಕಬಲ್ಲದು!
ಈ ಸಣ್ಣ  ಆಕರ್ಷಕ ಪ್ರಾಣಿಗಳಲ್ಲಿ ಸುಮಾರು 900ಕ್ಕೂ ಹೆಚ್ಚು ಪ್ರಭೇದಗಳಿವೆ. ಇವು ಎತ್ತರದ ಪರ್ವತಗಳಿಂದ ಹಿಡಿದು ಆಳದ ಸಮುದ್ರಗಳಲ್ಲಿಯೂ ಕಂಡುಬರುತ್ತದೆ. ಅಷ್ಟೇಅಲ್ಲ ಅಂತರಿಕ್ಷಕ್ಕೆ ತೆಗೆದುಕೊಂಡುಹೋಗಿ ಬಿಟ್ಟುಬಂದರೂ ಹಾಯಾಗಿ ತೇಲಾಡಿಕೊಂಡಿರುತ್ತದೆ. ನೀರಿಲ್ಲಿ ಕುದಿಸಿದರೂ, ಹೆಪ್ಪುಗಟ್ಟಿಸಿದರೂ, ಒತ್ತಡದಿಂದ ಅದುಮಿದರೂ ಇವಕ್ಕೆ ಏನೂ ಆಗುವುದಿಲ್ಲ. ಏಕೆಂದರೆ ಇದರ ದೇಹ ರಚನೆಯೇ ವಿಶಿಷ್ಟ. ವಿಜ್ಞಾನಿಗಳಿಗೂ ಈ ಬಗ್ಗೆ ಹೆಚ್ಚೇನೂ ತಿಳಿದಿಲ್ಲ. ಸಿಲಿಂಡರ್ ಆಕಾರದ ದೇಹ ಹೊಂದಿರುವ ಇವುಗಳಿಗೆ ಮೋಟಾದ 8 ಕಾಲುಗಳಿವೆ. ಪ್ರತಿ ಕಾಲಿನ ಪಾದದಲ್ಲಿ ಚಿಕ್ಕದಾದ 4-8 ಉಗುರುಗಳಿವೆ. ಹರಿತವಾದ ವಸ್ತುವಿನಂತಿರುವ ಬಾಯಿಯನ್ನು ಹೊಂದಿದೆ. ಚಿಕ್ಕದಾಗಿದ್ದರೂ ನೋಡಲು ಕರಡಿಯಂತೆ ಕಾಣುವುದರಿಂದ ಜಲಕರಡಿ ಎಂದು ಅನ್ವರ್ಥಕನಾಮ ಪಡೆದುಕೊಂಡಿದೆ.

ಅಣು ಸ್ಫೋಟ ಎದುರಿಸಬಲ್ಲದು!
ಈ ಜಲಕರಡಿ 357 ಡಿಗ್ರಿ ಸೆಲ್ಸಿಯಸ್ ಉಷ್ಣಾಂಶವನ್ನೂ ತಡೆದುಕೊಳ್ಳಬಲ್ಲದು. ಅದೇರೀತಿ - 457 ಡಿಗ್ರಿಗಿಂತ ಕಡಿಮೆ ತಾಪಮಾನವನ್ನೂ ಸಹಿಸಬಲ್ಲದು. ನೀರಿಲ್ಲದೇ ದಶಕಗಳ ಕಾಲ ಬದುಕಬಲ್ಲದು. ಏನಿಲ್ಲವೆಂದರೂ 200ಕ್ಕೂ ಹೆಚ್ಚುಕಾಲ ಇವು ಬದುಕುತ್ತವೆ. ಮನುಷ್ಯಸೇರಿದಂತೆ ಎಲ್ಲಾ ಪ್ರಾಣಿಗಳು 10-20 ರಷ್ಟು ಪ್ರಮಾಣದ ವಿಕಿರಣದಲ್ಲಿ ಸರ್ವನಾಶವಾಗುತ್ತವೆ. ಆದರೆ, ಟಾಡ್ರಿಗೇಟ್ ಮಾತ್ರ 5,700 ಪ್ರಮಾಣದ ವಿಕಿರಣವನ್ನೂ ಸಹಿಸುವ ಸಾಮಥ್ರ್ಯ ಹೊಂದಿದೆ. ಅಂದರೆ ಅಣುಸ್ಫೋಟವನ್ನು ಸಹ ಇವು ಎದುರಿಸಬಲ್ಲವು.

ವಿಶಿಷ್ಟ ಜೀವನ ಚಕ್ರ
ಇವು ಕೇವಲ ಸಸ್ಯ ಜೀವಕೋಶ, ಸಮುದ್ರ ಪಾಚಿ ಮತ್ತು ಸೂಕ್ಷ ಜೀವಿಗಳನ್ನು ತಿನ್ನುವದರಿಂದ ಅವುಗಳಿಗೆ ಈ ರೀತಿಯ ಬಲ ಬಂದಿದೆ ಎಂದು ಹೇಳಲಾಗಿದೆ. ಕೆಲವು ಜಲ ಕರಡಿಗಳು ಪ್ರತಿಜೀವಾಣು (ಆಂಟಿಬಯಾಟಿಕ್) ರೂಪದಲ್ಲಿ ಅನೇಕ ವರ್ಷಗಳಕಾಲ ಇರಬಲ್ಲದು. ಇವು  ಬೆಳವಣಿಗೆ  ಹೊಂದಿದ ಪ್ರಜಾತಿ ಆಧರಿಸಿ ವಿವಿಧ ಬಣ್ಣ ಮತ್ತು ಆಕಾದಲ್ಲಿ ಕಂಡುಬರುತ್ತವೆ. ಬೂದು, ನೀಲಿ ಹಳದಿ-ಕಂದು, ಕೆಂಪು ಬಣ್ಣಗಳನ್ನು ಇವು ಹೊಂದಿರುತ್ತವೆ. ಗಂಡಿಗಿಂತಲೂ ಹೆಣ್ಣು ಹೆಚ್ಚಿನ ಸಂಖ್ಯೆಯಲ್ಲಿರುತ್ತದೆ. ಜತೆಗೆ ಆಕಾರದಲ್ಲಿಯೂ ದೊಡ್ಡದು. ಅದು ತನ್ನ ಮೊಟ್ಟೆಗಳನ್ನು ಪೊರೆಯಲ್ಲಿ ಇರಿಸುತ್ತದೆ. ಈ ಮೊಟ್ಟೆಗಳು ಅನೇಕಬಾರಿ ರೂಪಾಂತರಗೊಂಡ ಬಳಿಕ ಪ್ರೌಢಾವಸ್ಥೆಗೆ ಬರುತ್ತದೆ. ಇದರ ಜೀವಕೋಶ ಇತರ ಯಾವುದೇ ಪ್ರಾಣಿಗಳಿಗೂ ಹೊಂದಿಕೆಯಾಗುವುದಿಲ್ಲ.

ಕತ್ತಲ ಜಗತ್ತಿನ ಕುಬ್ಜ ಆಕ್ಟೊಪಸ್

ಉದ್ದನೆಯ ಎಂಟು ಕಾಲುಗಳುಳ್ಳ ಆಕ್ಟೊಪಸ್ ನಮಗೆಲ್ಲಾ ಗೊತ್ತು. ಆದರೆ, ಅದರಲ್ಲಿ ಕುಬ್ಜವೆನಿಸಿದ ರೆಕ್ಕೆಗಳ ಮೂಲಕ ನೀರಿನಲ್ಲಿ ಈಜುವ ಆಕ್ಟೊಪಸ್ ಒಂದಿದೆ. ಅದೇ ಡಂಬೊ ಆಕ್ಟೊಪಸ್. ಆದರೆ, ಇದು ಇರುವುದು ಯಾರೂ ಹೋಗಲಾಗದ ಕತ್ತಲ ಜಗತ್ತಿನಲ್ಲಿ. ತಲೆಯ ಮೇಲ್ಭಾಗದಲ್ಲಿ ಕಿವಿಯಂತಿರುವ ರೆಕ್ಕೆಗಳು ಮತ್ತು ಕಾರ್ಟೂನ್ ಗಳಲ್ಲಿನ ಕಾಲ್ಪನಿಕ ಹಾರುವ ಆನೆಯ ಆಕೃತಿಯಿಂದಾಗಿ ಇವುಗಳಿಗೆ ಡಂಬೊ ಆಕ್ಟೊಪಸ್ ಎನ್ನುವ ಹೆಸರು ಬಂದಿದೆ. 

 

 ಬಹುತೇಕ ಸಮುದ್ರದ ಆಳದಲ್ಲಿ ವಾಸಿಸುವುದರಿಂದ ಇದರ ಪರಿಚಯ ಯಾರಿಗೂ ಅಷ್ಟಾಗಿ ತಿಳಿದಿಲ್ಲ. ಸಮುದ್ರದ ಸುಮಾರು 400 ಮೀಟರ್ನಿಂದ 7 ಕಿ.ಮೀ. ಆಳದಲ್ಲಿ ಇವು ಕಂಡುಬರುತ್ತದೆ. ಸಮುದ್ರ ತಳದಿಂದ ಸ್ವಲ್ಪ ಮೇಲ್ಭಾದಲ್ಲಿ ಇವು ಹೆಚ್ಚಾಗಿರುತ್ತವೆ. ಡಂಬೊ ಆಕ್ಟೊಪಸ್ನ್ನು ಪ್ರತ್ಯಕ್ಷವಾಗಿ ನೋಡ ಬಯಸುವವರು ಸಮುದ್ರದ ಕನಿಷ್ಠ 6.600 ಅಡಿಯಷ್ಟಾದರೂ ಆಳಕ್ಕೆ ಇಳಿಯುವ ಸಾಹಸಮಾಡಬೇಕು. ಏಕೆಂದರೆ ಈ ಆಕ್ಟೊಪಸ್ ಎಂದಿಗೂ ಮೇಲೆ ಬರುವುದಿಲ್ಲ. ಇಷ್ಟೊಂದು ಗುಪ್ತವಾಗಿ ವಾಸಿಸುವ ಇವು ಸೂರ್ಯನ ಬೆಳಕನ್ನೇ ನೋಡುವುದಿಲ್ಲ!

ಕಿವಿಯಿಂದ ಈಜಾಡುತ್ತೆ:
ಇದರ ವಿಶಿಷ್ಟತೆಯೆಂದರೆ ತಲೆಯ ಮೇಲಿರುವ ಕಿವಿಯಂತಿರುವ ಎರಡು ರೆಕ್ಕೆ. ಹಕ್ಕಿಯಂತೆ ಈ ರೆಕ್ಕೆಗಳನ್ನು ಬಡಿಯುತ್ತಾ ನೀರಿನಲ್ಲಿ ಸರಾಗವಾಗಿ ಈಜಾಡುವುದನ್ನು ವೀಕ್ಷಿಸುವದೇ ಒಂದು ಸುಂದರ ಅನುಭವ. ಇದರ ತಲೆ ದೇಹಕ್ಕಿಂಲೂ ದೊಡ್ಡದು. ಜತೆಗೆ ಒಂದಕ್ಕೊಂದು ಹೊಂದಿಕೊಂಡಿರುವ ಅಷ್ಟಪಾದಗಳನ್ನು ಸಂಕುಚನ-ವಿಕಸನಗೊಳಿಸುತ್ತಾ ಅಥವಾ ಮೂಗಿನ ಮೂಲಕ ನೀರು ಹೊರಬಿಟ್ಟು ಮುಂದಕ್ಕೆ ಸಾಗುತ್ತವೆ. ಡಂಬೊ ಆಕ್ಟೊಪಸ್ ಗಾತ್ರದಲ್ಲಿ 8 ಇಂಚಿನಷ್ಟು ದೊಡ್ಡದಿರುತ್ತದೆ. ಇವು ಮೃದುವಾದ ದೇಹ ಹೊಂದಿರುವುದರಿಂದ ಆಳ ಸಮುದ್ರದಲ್ಲಿ ವಾಸಿಸಲು ಸಾಧ್ಯವಾಗಿದೆ. ಡಂಬೊ ಆಕ್ಟೊಪಸ್ ನಲ್ಲಿ 37 ವೈವಿಧ್ಯಮಯ ಪ್ರಜಾತಿಗಳಿದ್ದು, ಆಕಾರ  ಮತ್ತು ಬಣ್ಣದಲ್ಲಿ ಒಂದಕ್ಕೊಂದು ವಿಭಿನ್ನ. ಅಷ್ಟೇಅಲ್ಲ ಗಂಡು ಮತ್ತು ಹೆಣ್ಣಿನ ಆಕಾರದಲ್ಲಿ ಸಂಪೂರ್ಣ ವ್ಯತ್ಯಾಸವಿದೆ.

 
ಇಡಿಯಾಗಿಯೇ ನುಂಗುತ್ತದೆ:
ಜಗತ್ತಿನ ಎಲ್ಲಾ ಏಳು ಮಹಾಸಾಗರಗಳಲ್ಲಿಯೂ ಇವು ಕಂಡುಬರುತ್ತವೆ. ಸಂಪೂರ್ಣ ಅಂಧಕಾರದಲ್ಲಿ ಬದುಕು ನಡೆಯುವುದರಿಂದ ಇದರ ಕಣ್ಣಿನ ದೃಷ್ಟಿ ಮಂದವಾಗಿರುತ್ತದೆ. ಇಲ್ಲಿ ಆಹಾರ ದೊರಕುವುದೇ ಅಪರೂಪವಾಗಿರುವುದರಿಂದ ಸಿಕ್ಕಿದ ಆಹಾರವನ್ನು ಬಹುಬೇಗನೆ ತಿನ್ನಬೇಕು. ಆದರೆ, ಆಹಾರ ಜೆಗೆದು ತಿನ್ನಲು ಈ ಆಕ್ಟೊಪಸ್ ಬಾಯಿಯಲ್ಲಿ ಹಲ್ಲುಗಳೇ ಇಲ್ಲ. ಹೀಗಾಗಿ ಇವು ಬೇಟೆಯನ್ನು ಇಡಿಯಾಗಿಯೇ ನುಂಗುತ್ತದೆ. ಇದರ ಅಷ್ಟ ಪಾದಗಳು ಪುಟ್ಟದಾಗಿದ್ದು, ಒಂದಕ್ಕೊಂದು ಜೋಡಣೆಯಾಗಿರುತ್ತದೆ. ಇದು ಈಜಾಡಲು ಮತ್ತು ಬೇಟೆಯನ್ನು ಹಿಡಿದುಕೊಳ್ಳಲು ನೆರವಾಗುತ್ತದೆ. ಡಂಬೋ ಆಕ್ಟೊಪಸ್ ಕುಬ್ಜವಾಗಿದ್ದರೂ ಉತ್ತಮ ಈಜುಗಾರ. 
ಇವು ಪಾರದರ್ಶಕವಾದ ತಮ್ಮ ಮೈಯನ್ನು ಬೇಕೆಂದಾಗ ತೊಳೆದುಕೊಳ್ಳತ್ತವೆ. ಇದರ ಸಂತಾನ ಕ್ರಮವೇ ವಿಚಿತ್ರ. ವರ್ಷದ ಎಲ್ಲಾ ಋತುವಿನಲ್ಲೂ ಮೊಟ್ಟೆ ಇಡುತ್ತಲೇ ಇರುತ್ತದೆ. ಗಂಡು ಆಕ್ಟೊಪಸ್ ವೀರ್ಯದ ಚೀಲವನ್ನು ಹೆಣ್ಣಿಗೆ ರವಾನಿಸುತ್ತದೆ. ಹೆಣ್ಣು ಅವುಗಳನ್ನು ಫಲಗೊಳಿಸಿ ಒಂದೊಂದೆ ಮೊಟ್ಟೆಗಳನ್ನು ಸಮುದ್ರದ ತಳದಲ್ಲಿ ಇಟ್ಟು ಬರುತ್ತದೆ.

ಬಾಲದಿಂದ ಕುಟುಕುವ ಚೇಳು

ಚೇಳು ಅಂದರೆ ಎಲ್ಲರಿಗೂ ಭಯ. ಕೆವೊಮ್ಮೆ ವಿಷ ಸರ್ಪಗಳಿಂಗಿಂತಲೂ ಚೇಳು ಅಪಾಯಕಾರಿ. ಚೇಳು ತುಂಬಾ ಚುರುಕು, ಅಡಗಿ ಕುಳಿತೇ ಕಾರ್ಯ ಕಾರ್ಯ ಸಾಧಿಸುವುದು ಇದರ ಬುದ್ಧಿ. ಇವು ಕ್ಷಣಾರ್ಧದಲ್ಲಿ ಮುಂದಿನ ಕೊಂಡಿಯಿಂದ ಹಿಡಿದು ಹಿಂದಿನ (ಬಾಲದ) ಮುಳ್ಳಿನಿಂದ ಕುಟುಕಿ ವಿಷ ಹರಿಸಿ ಬೇಟೆಯನ್ನು ನಿಷ್ಕ್ರಿಯಗೊಳಿಸುತ್ತದೆ.

 ಇದರ ಕಾಟ ಮಾನವರನ್ನೂ ಬಿಟ್ಟಿಲ್ಲ. 

ದೇಹ ಲಕ್ಷಣ:
ಚೇಳು ಪರಭಕ್ಷಕ ಜಾತಿಗೆ ಸೇರಿದ ಜಂತು. ಜೇಡದ ಸಮೀಪದ ಸಂಬಂಧಿ ಎನಿಸಿವೆ. ಚೇಳಿಗೆ ಎಂಟು ಪಾದಗಳಿವೆ. ಅವುಗಳ ಮುಂದಿರುವ ಇಕ್ಕಳದಂತಹ ವಾಸನೆ ಕಂಡುಹಿಡಿಯುವ ಜೋಡಿ ನಖಗಳು, ಪಟ್ಟಿಗಳುಳ್ಳ ಸಣ್ಣ ಸುರುಳಿ ಆಕಾರದ ಬಾಲ, ಇದರ ತುದಿಯಲ್ಲಿ ಇರುವುದೇ ವಿಷದ ಮುಳ್ಳು. ವಿಭಿನ್ನ ಭೌತಿಕ ಸ್ವರೂಪ, ಜೈವಿಕ ರಾಸಾಯನಿಕ ಮತ್ತು ನೈಸರ್ಗಿಕ ಅಳವಡಿಕೆಯಿಂದಾಗಿ ಇವು ಭೂಮಿಯ ಮೇಲೆ ಅನಾದಿಕಾಲದಿಂದ ಜೀವಿಸಲು ಸಾಧ್ಯವಾಗಿದೆ. 430 ದಶಲಕ್ಷ ವರ್ಷಗಳ ಹಿಂದಿನ ಪಳೆಯುಳಿಕೆಗಳು ಲಭ್ಯವಾಗಿವೆ.

ಎಲ್ಲೆಡೆಯೂ ವಾಸ:
ಚೇಳುಗಳು ಪ್ರಪಂಚದ ಎಲ್ಲಾ ಖಂಡಗಳಲ್ಲಿಯೂ ವ್ಯಾಪಕವಾಗಿ ಹರಡಿಕೊಂಡಿವೆ. ಆದರೆ, ಅಂಟಾರ್ಟಿಕಾ ಖಂಡದಲ್ಲಿ ಮಾತ್ರ ಇವು ಪತ್ತೆಯಾಗಿಲ್ಲ. ಇದರಲ್ಲಿ ಸುಮಾರು 13 ಕುಟುಂಬ  ವರ್ಗವಿದ್ದು, ಸುಮಾರು  1500 ಪ್ರಭೇದಗಳಿವೆ. ಇದರಲ್ಲಿ 111 ಪ್ರಭೇದ ಅಳಿವಿನ ಅಂಚಿನಲ್ಲಿದೆ. ಇಷ್ಟೊಂದು ವೈವಿಧ್ಯಮಯ ಪ್ರಭೇದಗಳಿರುವ ಚೇಳಿನಲ್ಲಿ ಕೇವಲ 25 ಜಾತಿಯ ಚೇಳು ಮಾತ್ರ ಮಾನವನ್ನು ಬಲಿ ಪಡೆಯುವಷ್ಟು ವಿಷಕಾರಿ. ಇವು  2 ರಿಂದ 10 ವರ್ಷದ ಜೀವತಾವಧಿ ಹೊಂದಿವೆ. ಕೆಲವು ಚೇಳುಗಳು 25 ವರ್ಷ ಕೂಡಾ ಬದುಕಬಲ್ಲವು. ಚೇಳುಗಳು  ನೈಸರ್ಗಿಕವಾಗಿ ಎಲ್ಲಾ ಪರಿಸರ ವ್ಯವಸ್ಥೆಗೆ ಹೊಂದಿಕೊಂಡಿದೆ. ಅತಿ ಎತ್ತರದ ಪರ್ವತ ಶಿಖರಗಳಲ್ಲಿಯೂ ಇವುಗಳನ್ನು ಕಾಣಬಹುದು. ಭೂಮಿಯ ಮೇಲ್ಭಾಗದಲ್ಲಿ, ಮರಗಳ ಮೇಲೆ, ಬಂಡೆಗಳ  ಅಡಿಯಲ್ಲಿ, ಮರಳಿನಲ್ಲಿ ಇರುವುದುದೆಂದರೆ ಅಚ್ಚು ಮೆಚ್ಚು. ಸಾಮಾನ್ಯವಾಗಿ ಇವು ಗಾತ್ರದಲ್ಲಿ 3 - 8 ಇಂಚು ದೊಡ್ಡದಾಗಿರುತ್ತದೆ.

ಕ್ಯಾನ್ಸರ್ಗೆ ರಾಮಬಾಣ:
ಚೇಳಿನ ವಿಷದಲ್ಲಿ ಪ್ರೊಟೀನ್ ಅಂಶ ಅಧಿಕವಾಗಿದ್ದು, ಔಷಧಿ ತಯಾರಿಕೆಯಲ್ಲಿ ಬಳಸಲಾಗುತ್ತದೆ. ಇದರ ವಿಷ ಚರ್ಮರೋಗ ವಿಜ್ಞಾನದಲ್ಲಿ ಮಹತ್ವದ ಪಾತ್ರ ವಹಿಸುತ್ತದೆ. ಅಲ್ಲದೆ ವಿಷದಲ್ಲಿರುವ ಕ್ಲೊರೊಟಾಕ್ಸಿನ್ ಮೆದುಳಿನ ಕ್ಯಾನ್ಸ್ರ್ನಿಂದ ಹಾಳಾದ ಕೋಶಳಗಳನ್ನು ಸರಿ ಪಡಿಸುತ್ತದೆ. ಕೀಲು ನೋವು, ಕಣ್ಣಿನ ಪೊರೆ ನಿವಾರಣೆ  ಮತ್ತು  ಶಕ್ತಿವರ್ಧಕವಾಗಿಯೂ ಚೇಳಿನ ವಿಷ ಬಳಕೆಯಾಗುತ್ತದೆ.

ಸಾಸ್ಕೃತಿ ರಾಯಭಾರಿ:
ಚೇಳನ್ನು ಕೆಲವು ದೇಶಗಳ ಸಂಸ್ಕೃತಿಯಲ್ಲಿಯೂ ಬಳಸಲಾಗುತ್ತದೆ. ಹಿಂದು ಪಂಚಾಂಗದಲ್ಲಿ ವೃಶ್ಚಿಕ (ಚೇಳು) 12 ರಾಶಿಚಕ್ರದ ಭವಿಷ್ಯದಲ್ಲಿ ಅಳವಡಿಸಲಾಗಿದೆ. ಪ್ರಾಚಿನ ಈಜಿಪ್ತ ದೇಶದ ದೆವತೆಯನ್ನು ವೃಶ್ಚಿಕಕ್ಕೆ ಹೋಲಿಕೆ ಮಾಡಲಾಗಿದೆ. ಇಸ್ಲಾಮಿಕ್ಕಲೆಗಳಲ್ಲಿಯೂ ಚೇಳು ಸ್ಥಾನ ಪಡೆದಿದೆ.

 ಚೇಳಿನ  ಕುತೂಹಲಕಾರಿ ಅಂಶಗಳು

• ಕೆಲವು  ಜಾತಿಯ ಚೇಳುಗಳು ಆಹಾರ ನೀರು ಸೇವಿಸದೇ ಒಂದು ವರ್ಷ ಬದುಕಬಲ್ಲವು.
• ಮ್ಯಾಕ್ಸಿಕೊದಲ್ಲಿ ಚೇಳಿನ ಕಡಿತದಿಂದ ಪ್ರತಿವರ್ಷ  ಸಾವಿರಾರು ಜನ  ಸಾವನ್ನಪ್ಪುತ್ತಾರೆ.
• ಇವು ಸ್ವಜಾತಿಯನ್ನೆ ತಿನ್ನುವುದರಿಂದ ಬಹುತೇಕ  ಏಕಾಂಗಿಯಾಗಿ  ಜೀವನಸಾಗಿಸತ್ತವೆ.
• ಇವುಗಳಿಗೆ ಸರಿಯಾಗಿ ಕಣ್ಣು ಕಾಣಿಸುವುದಿಲ್ಲ. ಆದರೆ ಕೆಲವು ಚೇಳುಗಳಿಗೆ 10 ಕಣ್ಣುಗಳಿರುತ್ತವೆ.
• ಚೇಳು ಉತ್ತಮ ವಾಸನೆ ಗ್ರಹಿಸುವ ಸಾಮರ್ಥ್ಯ  ಹೊಂದಿವೆ. ಆಹಾರ ಹುಡುಕಲು ಇವು ನೆರವಾಗುತ್ತವೆ.
• ಸುತ್ತಮುತ್ತಲಿನ ಪರಿಸರ ತಿಳಿಯಲು ಭೂಮಿಯ ಕಂಪನದ ಮೇಲೆ ಅವಲಂಬಬಿತವಾಗಿವೆ.
• ಇವು ಕೇವಲ ದ್ರವ ಪದಾರ್ಥಗಳನ್ನಷ್ಟೆ ಸೇವಿಸಿ, ಬೇಟೆಯನ್ನು  ಹಾಗೆಯೇ ಬಿಡುತ್ತದೆ.
• ಅರಿಜೋನಾದಲ್ಲಿ ಕಂಡುಬರುವ ಪಟ್ಟೆ ಚೇಳು ಅತ್ಯಂತ ವಿಷಕಾರಿ ಎನಿಸಿಕೊಂಡಿದೆ.

ಶಾರ್ಕ್ ಗಳ ಅದ್ಭುತ ಜೀವ ಲೋಕ

ಅಕಶೇರುಕಗಳನ್ನು ಕಶೇರುಕಗಳೊಂದಿಗೆ ಜೋಡಿಸುವ ಕೊಂಡಯೇ ಶಾಗಳು. ಇವುಗಗಳನ್ನು ಮೂಳೆ ಇರದೇ ಕೇವಲ ಮಾಂಸವಷ್ಟೇ ಇರುವ ಮೃದ್ವಸ್ತಿಗಳೆಂದು ವಿಂಗಡಿಸಲಾಗಿದೆ. ಜಲಚರಗಳ ವಿಕಸನ ಸರಣಿಯ ಅಮೋಘ ಜೀವಿ ಶಾರ್ಕ್ ಜಾತಿಯ ಜೀವಸಂಕುಲ. ಶಾರ್ಕ್ ನಲ್ಲಿ ರೇ ಮತ್ತು ಸ್ಕೇಟ್ಎನ್ನುವ ಉಪ ಜಾತಿಗಳಿವೆ. ಅಲ್ಲದೇ ಶಾರ್ಕ್ ನಲ್ಲಯೂ ಹಲವು ವಿಧಗಳಿದ್ದು, ಶ್ವೇತ ಶಾರ್ಕ್, ಎಲಿಫೆಂಟ್ ಶಾರ್ಕ್, ಹ್ಯಾಮರ್ ಅಥವಾ ಸುತ್ತಿಗೆ ತಲೆಯ ಶಾರ್ಕ್, ವಾಕಿಂಗ್ ಶಾರ್ಕ್ , ಗರಗಸ ಶಾರ್ಕ್  ಹೀಗೆ 450ಕ್ಕೂ ಹೆಚ್ಚಿನ ಶಾರ್ಕ್  ಪ್ರಭೇದಗಳನ್ನು ಇದುವರೆಗೆ ಪತ್ತೆಹಚ್ಚಲಾಗಿದೆ. ಅವುಳಲ್ಲಿ ವಿಶಿಷ್ಟವೆನಿಸಿದ ಎರಡು ಪ್ರಬೇಧದ ಮಾಹಿತಿ ಇಲ್ಲಿದೆ.

 ನಡೆದಾಡುವ ಶಾರ್ಕ್ !
ಶಾರ್ಕ್ ಎಂದೊಡನೆ ವೇಗವಾಗಿ ಈಜತ್ತಾ, ಮೀನನ್ನು ಕಚ್ಚಿ ಓಡುವ ವೈಟ್ ಶಾರ್ಕ್  ಕಣ್ಣಮುಂದೆ ಬರುತ್ತದೆ. ಆದರೆ, ನಡೆದಾಡುವ ಶಾರ್ಕ್  ಇರಬಹುದೆಂದು ಯಾರೂ ಊಹಿಸಿರಲಿಕ್ಕಿಲ್ಲ. ಈ ಮೀನಿನ ಕಿವಿಸೀಳಿನ ಕೆಳಭಾಗದ ರೆಕ್ಕೆಗಳು ನಡೆಪಾದದಂತೆ ಮಾರ್ಪಾಡು ಗೊಂಡಿರುತ್ತವೆ. ಇದು ತನ್ನ ರೆಕ್ಕೆಯ ಸಹಾಯದಿಂದ ನೀರಿನ ತಳಭಾಗದಲ್ಲಿ ಓಡಾಡುತ್ತದೆ! ಹೀಗೆ ಸಮುದ್ರದ ತಳದಲಲ್ಲಿ ಓಡಾಡುವ ಮೀನಿನ  ಹೆಸರು; ಎಪಾಲುಟರ್ಟ್  ಶಾರ್ಕ್ .  ಇದನ್ನು ವಾಕಿಂಗ್ ಶಾರ್ಕ್  ಎಂದೂ ಕರೆಯುತ್ತಾರೆ. ಇವುಗಳಲ್ಲಿಯೂ ಸುಮಾರು 22 ಪ್ರಜಾತಿಗಳನ್ನು ಗುರುತಿಸಲಾಗಿದೆ.

ಹವಳದ ದಂಡೆಯಲ್ಲಿ ವಾಸ:
ಆಸ್ಟ್ರೇಲಿಯಾದ ಸಮುದ್ರದ ಹವಳದ ದಂಡೆಗಳಲ್ಲಿ ಹೆಚ್ಚಾಗಿ ಕಂಡುಬರುವ ಈ ಮೀನು ಹೆಚ್ಚು ಆಳದ ನೀರಿಗೆ ಹೋಗುವುದಿಲ್ಲ. ಇದು ಗಾತ್ರದಲ್ಲಿ ಮಾಮೂಲಿ ಮೀನಿನಂತೆ ಕಂಡಬರುತ್ತದೆ. ವಯಸ್ಕ ಶಾರ್ಕ್  ಸುಮಾರು 30ರಿಂದ 80 ಸೆಂ.ಮೀಗೂ ಮೀರಿರುವುದಿಲ್ಲ. ಹೀಗಾಗಿ ಇದು ಇತರೇ ದೊಡ್ಡ ಮೀನಿಗೆ ಅಥವಾ ಇತರೇ ಶಾರ್ಕ್ ಗಳಿಗೆ ಆಹಾರವಾಗುವ ಸಾಧ್ಯತೆ ಹೆಚ್ಚು. ಈ ಕಾರಣದಿಂದ ಎಪಾಲುರ್ಟ್  ಶಾರ್ಕ್  ಅದ್ಭುತ ದೇಹ ವರ್ಣಮಾರ್ಪಾಡಿನ ಹೊಂದಾಣಿಕೆ ಮಾಡಿಕೊಳ್ಳುತ್ತದೆ. ಮೈ ಮೇಲಿನ ಮಚ್ಚೆಗಳು ಹಾಗೂ ವರ್ಣ ವಿನ್ಯಾಸವನ್ನು ಪರಿಸರದ ಹಿನ್ನೆಲೆಯಲ್ಲಿ ಬದಲಿಸಿಕೊಂಡು ತನ್ನನ್ನು ಕಬಳಿಸಲು ಹೊಂಚುಹಾಕುವ ಮೀನುಗಳಿಂದ ಪಾರಾಗುತ್ತದೆ. ಇವು  ಮೊಟ್ಟೆ ಇಡುವ ಶಾರ್ಕ್ ಗಿದ್ದು ಒಮ್ಮೆಲೇ ಎರಡರಂತೆ ವರ್ಷಕ್ಕೆ 30ರಿಂದ 40 ಮೊಟ್ಟೆ  ಇಡುತ್ತವೆ.
ಇವು ನಿಷಾಚರಿಗಳಾಗಿದ್ದು ಚಿಕ್ಕ ಮೀನು, ಸಿಗಡಿ ಇತ್ಯಾದಿಗಳನ್ನು ತಿಂದು ಬದುಕುತ್ತದೆ. ಇವುಗಳ ಇನ್ನೊಂದು ವಿಶೇಷವೆಂದರೆ, ಅತಿ ಕಡಿಮೆ ಕರಗಿದ ಆಮ್ಲಜನಕವಿರುವ ನೀರಿನಲ್ಲೂ ನಾಲ್ಕೈದು ಗಂಟೆ ಆರಾಮವಾಗಿ ಓಡಾಡಬಲ್ಲವು. ಆಮ್ಲಜನಕವೇ ಇಲ್ಲದೇ ಒಂದು ಗಂಟೆಗಳ ಕಾಲ ಜೀವಿಸಿದ ನಿದರ್ಶನವೂ ಇದೆ. ಈ ಮೀನು  ಕಶೇರಿಕಗಳ ಮೊದಲ ಕೊಂಡಿಯಾಗಿರುವುದರಿಂದ ವೈದ್ಯಶಾಸ್ತ್ರದ ಪ್ರಮುಖ ಅಧ್ಯಯನ ವಿಷಯವಾಗಿದೆ.

ಎಲಿಫೆಂಟ್ ಶಾರ್ಕ್ !
ಗಜಮುಖದ ಶಾರ್ಕ್ , ಭೂತ ಮೀನು ಅಥವಾ ಖಮಿರಾ ಎಂದು ಕರೆಯಲ್ಪಡುತ್ತದೆ. ಆಸ್ಟ್ರೇಲಿಯಾ ಮತ್ತು ನ್ಯೂಜಿಲ್ಯಾಂಡ್ ಸಮುದ್ರಗಳಲ್ಲಿ ಸುಮಾರು 200 ರಿಂದ 500 ಮೀಟರ್ ಆಳದಲ್ಲಿ ಕಂಡುಬರುತ್ತದೆ. ಇದು ಹೆಚ್ಚೆಂದರೆ 1 ರಿಂದ 1.2 ಮೀಟರ್ ಉದ್ದ ಬೆಳೆಯುತ್ತದೆ. ಮುಖದ ಮುಂಭಾದಲಲ್ಲಿ ಸೊಂಡಿಲನ್ನು ಹೊಂದಿಇದ್ದರಿಂದ ಇದಕ್ಕೆ ಗಜಮುಖ ಶಾರ್ಕ್  ಅಥವಾ ಎಲಿಫೆಂಟ್ ಶಾರ್ಕ್   ಎನ್ನುವ ಹೆಸರು ಬಂದಿದೆ. ಇವು ಸುಮಾರು  430 ದಶ ಲಕ್ಷ ವರ್ಷಗಳ ಹಿಂದೆಯೇ ಇವುವಿಕಾಸಹೊಂದಿವೆ ಎಂದು ಅಂದಾಜಿಸಲಾಗಿದೆ. ಜೀವವಾಹಿನಯ ವಿಕಸನದ ಕೊಂಡಿ ಎಂದೇ ಎಲಿಫೆಂಟ್ ಶಾರ್ಕ್ ಗುರುತಿಸಿಕೊಂಡಿದೆ.


 

ರಣ ಹದ್ದು ಎಂಬ ಆಕಾಶದ ಕಾವಲುಗಾರ

ರಣ ಹದ್ದು! ಈ ಹೆಸರು ಕೇಳಿದರೇ ಮಕ್ಕಳಾದಿಯಾಗಿ ಎಲ್ಲರಿಗೂ ಭಯ. ಆಕಾಶದಲ್ಲಿ ಎಷ್ಟೇ ಎತ್ತರದಲ್ಲಿ ಹಾರಾಡುತ್ತಿದ್ದರೂ ಶವಗಳ ಸುತ್ತ ದಿಢೀರನೆ ಪ್ರತ್ಯಕ್ಷವಾಗುತ್ತಿದ್ದ, ನಮ್ಮ ಸಾಕು ಪ್ರಾಣಿ ಹಾಗೂ ವನ್ಯಜೀವಿಗಳ ಶವಗಳನ್ನು ತಿಂದು ಊರನ್ನು ದುರ್ವಾಸನೆಯಿಂದ ರಕ್ಷಿಸುತ್ತಿದ್ದ ರಣ ಹದ್ದುಗಳು ಈಗ ನಿಧಾನವಾಗಿ ನಮ್ಮಿಂದ ಕಣ್ಮರೆಯಾಗುತ್ತಿವೆ. ಹಿಂದೊಮ್ಮೆ ಭಾರತದಲ್ಲೂ ಸಾಕಷ್ಟು ಸಂಖ್ಯೆಯಲ್ಲಿದ್ದ ಬೋಳು ತಲೆಯ ರಣ ಹದ್ದುಗಳು ಕಾಣ ಸಿಗುವದೇ ಅಪರೂಪ.

ಲಕ್ಷಣಗಳು:

• ಬೋಳು ತಲೆ, ಉದ್ದನೆಯ ಕತ್ತು, ಚಿಕ್ಕ ಬಾಲ, ಕತ್ತಿನ ಸುತ್ತ ಬಿಳಿಯ ಗರಿ, ಕಂದು ಬಣ್ಣದ ಮೈ, ಮಾಂಸ ಕತ್ತರಿಸುವ ಬಲಿಷ್ಠ ಕೊಕ್ಕು, ವಿಶಾಲವಾದ ರೆಕ್ಕೆ. ಭಯ ಹುಟ್ಟಿಸುವ ಕಣ್ಣು ಇವಿಷ್ಟು ಬಿಳಿ ಹಿಂತಲೆಯ ರಣ ಹದ್ದಿನ ವಿಶೇಷತೆ. 
• ಆಫ್ರಿಕಾದಲ್ಲಿ ಕಂಡುರುವ ಹದ್ದುಗಳಲ್ಲಿಯೇ ಅತ್ಯಂತ ದೊಡ್ಡ ಪಕ್ಷಿ ಬಿಳಿ ಹಿಂತಲೆಯ ರಣ ಹದ್ದು. ಇದನ್ನು ಹಳೆ ಜಗತ್ತಿನ ಹದ್ದು ಎಂದು ಗುರುತಿಸಲಾಗಿದೆ. ಈ ತಲೆಮಾರಿನ ಹದ್ದುಗಳ ತಲೆ ಗರಿಗಳಿಂದ ತುಂಬಿರುತ್ತದೆ.
•  ಜತೆಗೆ ಗಾತ್ರದಲ್ಲಿಯೂ ಚಿಕ್ಕದು. ಆದರೆ, ಬೋಳು ತಲೆಯ ರಣ ಹದ್ದು 4ರಿಂದ 7 ಕೇಜಿ ಭಾರ ಮತ್ತು 94 ಸೆ.ಮೀ.ನಷ್ಟು ಉದ್ದ ಮತ್ತು 218 ಸೆ.ಮೀ ನಷ್ಟು ಅಗಲವಾದ ರೆಕ್ಕೆ ಹೊಂದಿದೆ. 
• ಈ ಜಾತಿಯ ಹದ್ದುಗಳು ಆಫ್ರಿಕಾ, ಏಷ್ಯಾ ಮತ್ತು ಯುರೋಪ್ಗಳಲ್ಲಿ ಹೆಚ್ಚಾಗಿ ಕಂಡು ಬರುತ್ತದೆ. ಅವುಗಳ ಜಾತಿಗೆ ಸೇರಿದ ಬಿಳಿ ಪೃಷ್ಠದ ರಣ ಹದ್ದು ಭಾರತದಲ್ಲಿಯೂ ಕಂಡು ಬರುತ್ತದೆ. ಬೋಳು ತಲೆ ರಣ ಹದ್ದು ಕೇವಲ ಮಾಂಸವನ್ನು ಮಾತ್ರ ತಿನ್ನುತ್ತವೆ.

ಮಾನವನೇ ಶತ್ರು:
 ಮಾನವನನ್ನು ಬಿಟ್ಟರೆ ಹುಲಿಯಿಂದ ಮಾತ್ರ ಇವುಗಳನ್ನು ಬೇಟೆಯಾಡಲು ಸಾಧ್ಯ. ಉಳಿದಂತೆ ಇವಕ್ಕೆ ಯಾರೂ ವೈರಿಗಳಿಲ್ಲ. ವೈರಿಗಳಿಂದ ಪಾರಾಗುವ ಸಲುವಾಗಿ ಇವು ಈಗತಾನೇ ತಿಂದ ಆಹಾರವನ್ನು ಕೊಂಡೊಯ್ಯುತ್ತವೆ ಅಥವಾ ಆ ಜಾಗದಲ್ಲಿ ಕೆಲವು ದಿನಗಳ ಕಾಲ ಗಬ್ಬು ವಾಸನೆ ಸೂಸುವ ವಾಂತಿ ಮಾಡುತ್ತವೆ. ಹೀಗಾಗಿ ಇವುಗಳಿಂದ ಆಹಾರ ಕಸಿಯುವ ಸಾಹಸಕ್ಕೆ ಯಾರೂ ಹೋಗುವುದಿಲ್ಲ.  

ಆಕಾಶದಲ್ಲಿ ಗಸ್ತು:
ಹದ್ದು ಶ್ರಮವಿಲ್ಲದೇ ಹಾರಾಟ ನಡೆಸುತ್ತವೆ. ರೆಕ್ಕೆ ಬಡಯದೇ ಒಂದು ತಾಸುಗಳ ಕಾಲ ಆಕಾಶದಲ್ಲಿ ಸುತ್ತುಹೊಡೆಯಬಲ್ಲದು. ಈ ತಲೆಮಾರಿನ ಹದ್ದುಗಳು ವಾಸನೆಯ ಮೂಲಕ ಆಹಾರ ಹುಡುಕುವ ಸಾಮರ್ಥ್ಯ ಹೊಂದಿದ್ದರೆ, ಹಳೆ ಜಗತ್ತಿನ ಹದ್ದು ಎಂದು ಗುರುತಿಸಿಕೊಂಡಿರುವ ಬೋಳು ತಲೆಯ ರಣ ಹದ್ದು ಕಣ್ಣಿನ ಸಹಾಯದಿಂದ ಆಹಾರ ಹುಡುಕುತ್ತದೆ. ಇದರ ದೃಷ್ಟಿ ಮಾನವನಿಗಿಂತ 8 ಪಟ್ಟು ಸೂಕ್ಷ್ಮ. ಅಂದರೆ ಇವು 3 ಅಡಿ ಎತ್ತರದ ಪ್ರಾಣಿಗಳನ್ನು ನಾಲ್ಕು ಮೈಲಿಯಷ್ಟು ಎತ್ತರದಿಂದಲೇ ಸ್ಪಷ್ಟವಾಗಿ ಗುರುತಿಸಬಲ್ಲದು. ಆಕಾಶದಲ್ಲಿ ಇವು ಸುತ್ತು ಹೊಡೆಯುತ್ತಾ ಕ್ರಮೇಣ ತಮ್ಮ ಸಂಖ್ಯೆ ಹೆಚ್ಚಿಸಿಕೊಳ್ಳುತ್ತವೆ. ಗುಂಪಾಗಿಯೇ ದಾಳಿ ನಡೆಸುತ್ತವೆ. ಸತ್ತ ಪ್ರಾಣಿಗಳ ಮುಂದೆ ನೂರಕ್ಕೂ ಹೆಚ್ಚು ಹದ್ದು ಜಮಾವಣೆಗೊಂಡು ಹಂಚಿಕೊಂಡು ಆಹಾರ ತಿನ್ನುತ್ತವೆ.

ಹಾರಾಟಕ್ಕೆ ಕೊನೆಯೇ ಇಲ್ಲ:
ಹದ್ದು ಹಾರುವ ಎತ್ತರಕ್ಕೆ ಕೊನೆಯೇ ಇಲ್ಲ. 12 ಕಿಮೀ ಎತ್ತರಕ್ಕೂ ಹದ್ದು ತಲುಪಬಲ್ಲದು. ಅಲ್ಲದೇ ತಾಸಿಗೆ 60-80 ಕಿಮೀ ವೇಗದಲ್ಲಿ ಸಾವಿರಾರು ಕಿಮೀ ಸುತ್ತಳತೆಯನ್ನು ಗಸ್ತು ಹೊಡೆಯುತ್ತವೆ. ಆಹಾರ ಕಂಡೊಡನೆ ಗಂಟೆಗೆ 120 ಕಿಮೀ ವೇಗದಲ್ಲಿ ನೆಲಕ್ಕೆ ಇಳಿದು ಶವಗಳ ಮುಂದೆ ಪ್ರತ್ಯಕ್ಷವಾಗುತ್ತವೆ. ಎತ್ತರದ ಮರಗಳ ತತ್ತತುದಿಯಲ್ಲಿ ಇವು ಗೂಡು ಕಟ್ಟುತ್ತದೆ. ಆದರೆ ಈ ದೊಡ್ಡ ಹದ್ದುಗಳ ಗೂಡು ಕಾಗೆ ಗೂಡಿನಷ್ಟೇ ಚಿಕ್ಕದು.

ಪರಿಸರ ಸ್ನೇಹಿ:
ಹದ್ದು ಕೊಳೆತ ಪ್ರಾಣಿಗಳ ದೇಹವನ್ನು ತನ್ನುವುದರಿಂದ ಹರಡಬಹುದಾದ ರೋಗ-ರುಜಿನೆಗಳಿಂದ ಊರನ್ನು ರಕ್ಷಿಸುತ್ತಿದ್ದವು. ಪಾರ್ಸಿ ಜನಾಂಗದವರ ದೇಹ ತಿನ್ನಲೂ ರಣ ಹದ್ದುಗಳೇ ಬೇಕು. ಆದರೆ ಬೋಳು ತಲೆಯ ರಣ ಹದ್ದು ಕ್ರಮೇಣ ಅಳಿವಿನ ಅಂಚಿಗೆ ತಲುಲಿದೆ. ಇವುಗಳ ಸಂಖ್ಯೆ ದಿನದಿಂದ ದಿನಕ್ಕೆ ಕ್ಷೀಣಿಸುತ್ತಿದ್ದು ಮುಂದೊಂದು ದಿನ ಸಂಪೂರ್ಣ ಕಣ್ಮರೆಯಾದರೂ ಅಚ್ಚರಿಯಿಲ್ಲ.

 

ಫೈರ್ ಫಾಕ್ಸ್ ಹೆಸರಿನ ಕೆಂಪು ಪಾಂಡಾ

ನೀವೆಲ್ಲಾ ಇಂಟರ್ ನೆಟ್ ಬ್ರೌಸರ್- ಫೈರ್ ಫಾಕ್ಸ್ ಹೆಸರು ಕೇಳಿರುತ್ತೀರಿ. ಚಿಕ್ಕ ಮಕ್ಕಳ ಕಾರ್ಟೂನ್ ಸೀರಿಯಲ್ ಗಳಲ್ಲಿಯೂ ಫೈರ್ ಫಾಕ್ಸ್ ಪ್ರಮುಖ ಪಾತ್ರ ನಿರ್ವಹಿಸುತ್ತದೆ. ಆದರೆ ಇಂಥದ್ದೊಂದು ಪ್ರಾಣಿ ಇದೆ ಎನ್ನುವುದು ಗೊತ್ತೇ? ಹೀಗೆ ಫೈರ್ ಫಾಕ್ಸ್ ಎಂದು ಹೆಸರು ಪಡೆದಿರುವ ಪ್ರಾಣಿ ಕೆಂಪು ಪಾಂಡಾ! 

ವಿಶಿಷ್ಟ ಜಾತಿಯ ಪ್ರಾಣಿ:
ನೋಡಲು ಬೆಕ್ಕಿನಂತೆ ಕಾಣುವ ಕೆಂಪು ಪಾಂಡಾ, ಬೆಕ್ಕಿನ ಜಾತಿಗೆ ಸೇರಿಲ್ಲ. ಒಂದೇ ಹೆಸರನ್ನು ಹೊಂದಿದ್ದರೂ ನಿಜವಾದ ಪಾಂಡಾ ಸಂತತಿಗೂ ಇವು ಸೇರಿಲ್ಲ. ಬದಲಾಗಿ ರಕೂನ್ ಎನ್ನುವ ವಿಶಿಷ್ಟ ನರಿಯ ಸಂತತಿಗೆ ಇವು ಸೇರಿವೆ. ಮೂಲತಃ ಕೆಂಪು ಪಾಂಡಾ ವೃಕ್ಷದಲ್ಲಿ ವಾಸಿಸುವ ಒಂದು ಸಸ್ತನಿ. ಹಿಮಾಲಯದ ತಪ್ಪಲು ಪ್ರದೇಶ ಮತ್ತು ದಕ್ಷಿಣ ಚೀನಾದಲ್ಲಿ ಮಾತ್ರ ಇವುಗಳ ಸಂತತಿ ಕಂಡು ಬರುತ್ತದೆ. ದೈತ್ಯ ಗಾತ್ರದ ಪಾಂಡಾಗಳಂತೆ ವಿಪರೀತ ಮಳೆ ಬೀಳುವ, ಎತ್ತರದ ಕಾಡುಗಳಲ್ಲಿ ಮಾಡುತ್ತವೆ. ಆದರೆ ಅವುಗಳಿಗಿಂತ ವಿಸ್ತಾರವಾದ ವಾಸಸ್ತಾನವನ್ನು ಇವು ಹೊಂದಿವೆ.

ಕಾಣುವುದೇ ಅಪರೂಪ
ಕೆಂಪು ಪಾಂಡಾಗಳು ಭಾರತ, ಭೂತಾನ್, ಚೀನಾ, ಲಾವೋಸ್, ಮ್ಯಾನ್ಮಾರ್ ಮತ್ತು ನೇಪಾಳದ ಪರ್ವತ ಶ್ರೇಣಿಗಳಲ್ಲಿ ಕಂಡು ಬರುತ್ತವೆ. ಮರಗಳ ಮೇಲೆಯೇ ಇವು ಹೆಚ್ಚಾಗಿ ವಾಸ ಮಾಡುವುದರಿಂದ ಯಾರ ಕಣ್ಣಿಗೂ ಅಷ್ಟಾಗಿ ಕಂಡು ಬರುವುದಿಲ್ಲ. ಇವುಗಳ ತಲೆ ಮತ್ತು ದೇಹ 50 ರಿಂದ 64 ಸೆ.ಮೀ ನಷ್ಟು ದೊಡ್ಡದಾಗಿದ್ದರೆ. ಬಾಲ 30 ರಿಂದ 60 ಮೀಟರ್ ಉದ್ದವಾಗಿರುತ್ತದೆ. ಗಂಡು ಪಾಂಡಾ 4ರಿಂದ 6 ಕೇಜಿಯಷ್ಟು ತೂಕವಿರುತ್ತದೆ. ಇವು ಕೆಂಪು ಬಣ್ಣದ ಮೈಬಣ್ಣದಿಂದ ಮರದಲ್ಲಿ ಅಡಗಿಕೊಳ್ಳಲು ಸಹಕಾರಿಯಾಗಿವೆ. ಕತ್ತಲಿನ ಪ್ರದೇಶಗಳೆಂದರೆ ತುಂಬಾ ಪ್ರೀತಿ. ಹೆಚ್ಚಾಗಿ ತಂಪಾದ ಕಾಡುಗಳಲ್ಲಿ ಏಕಾಂತದಲ್ಲಿ ವಾಸಿಸುವುದೆಂದರೆ ಕೆಂಪು ಪಾಂಡಾಗೆ ಇಷ್ಟ. ರಾತ್ರಿಯ ವೇಳೆ ತುಂಬಾ ಇವು ಸಕ್ರಿಯ. ನರಿಯಂತೆ ಕೀರಲು ಧ್ವನಿಯಲ್ಲಿ ಕೂಗುತ್ತಾ ಸೀಟಿ ಹೊಡೆಯುವುದು ಇದರ ಇನ್ನೊಂದು ಸ್ವಭಾವ. ಇವು ನಿದ್ರಿಸುವಾಗ ಬಾಲದಿಂದ ತಲೆಯನ್ನು ಮುಚ್ಚಿಕೊಂಡಿರುತ್ತವೆ. ಇವು ದಿನದ 13 ಗಂಟೆಗಳನ್ನು ತಿನ್ನುವುದರಲ್ಲಿಯೇ ಕಳೆಯುತ್ತವೆ.

ಮೈ ಮೇಲೆ ಉಣ್ಣೆಯ ಹೊದಿಕೆಕೆಂಪು ಪಾಂಡಾದ ಮೈ- ನವಿರಾದ ಉಣ್ಣೆಯ ಹೊದಿಕೆಯಿಂದ ಆವೃತ್ತವಾಗಿದೆ. ಹೀಗಾಗಿ ಎಷ್ಟೇ ಪ್ರಮಾಣದ ಚಳಿಯನ್ನೂ ಇವು ತಡೆದುಕೊಳ್ಳಬಲ್ಲವು. ತಲೆಯ ಭಾಗ ಕೆಂಪು ಮತ್ತು ಕಂದು ಬಣ್ಣದ ಗರಿಗಳಿಂದ ಕೂಡಿದೆ. ಮೂಗು, ಕಣ್ಣು ಮತ್ತು ಕಿವಿಯ ಭಾಗ  ಬಿಳುಪಾಗಿದೆ. ಕಾಲು ಮತ್ತು ಒಳಗಿನ ಭಾಗ ಕಪ್ಪಾಗಿರುತ್ತವೆ. ಅಲ್ಲದೇ ಬೆಕ್ಕಿನಂತೆ ಮುಖದ ಮೇಲೆ ಉದ್ದನೆಯ ಮೀಸೆ ಮತ್ತು ನರಿಗಳಂತೆ ಉದ್ದನೆಯ ಬಾಲ ಇವೆ. ಒಟ್ಟಿನಲ್ಲಿ ದೈತ್ಯ ಪಾಂಡಾ ಮತ್ತು ಕೆಂಪು ಪಾಂಡಾಗಳ ನಡುವೆ ಭಾರೀ ವ್ಯತ್ಯಾಸವಿದೆ.  

ಸರ್ವ ಭಕ್ಷಕಗಳು:
 ಇವು ಪಾಂಡಾ ಕೈಗೆ ಸಿಕ್ಕಿದ್ದನ್ನೆಲ್ಲಾ ತಿನ್ನುತ್ತದೆ. ಹಣ್ಣು, ಕೀಟ, ಅಣಬೆ, ಬೇರು ಹುಲ್ಲು, ಚಿಕ್ಕಪುಟ್ಟ ಪಕ್ಷಿ, ಬಿದಿರು ಹೀಗೆ ಎಲ್ಲವನ್ನೂ ಜೀರ್ಣಿಸಿಕೊಳ್ಳುತ್ತವೆ. ಕೆಂಪು ಪಾಂಡಾಗೆ ಬೇಟೆಯಾಡಲು ಬರುವುದಿಲ್ಲ. ಮರದ ಮೇಲೆ ಚುರುಕಿನಿಂದ ಓಡಾಡುವ ಇವು ನೆಲದ ಮೇಲೆ ಅಷ್ಟೇನೂ ಚುರುಕಿನಿಂದ ಇರುವುದಿಲ್ಲ. ಇವು ಬಹುತೇಕ ಜೀವಿತದ ಅವಧಿಯನ್ನು ಮರದ ಮೇಲೆಯೇ ಕಳೆಯುತ್ತವೆ. ಊಟ, ವಸತಿ ನಿದ್ರೆ ಎಲ್ಲವೂ ಮರದಮೇಲೆಯೇ. 
ಕಣ್ಮರೆಯ ಭೀತಿ:
 ಕೆಂಪು ಪಾಂಡಾಗಳು ಅಳಿವಿನ ಅಂಚಿಗೆ ತಲುಪಿದ್ದು, ದಕ್ಷಿಣ ಚೀನಾ, ಬರ್ಮಾ, ನೇಪಾಳ ಮತ್ತು ಭೂತಾನ್ನಲ್ಲಿ ಈಗ ಕೇವಲ 2,500 ಕೆಂಪು ಪಾಂಡಾಗಳು ಮಾತ್ರ ಉಳಿದುಕೊಂಡಿವೆ.  ಉತ್ತಮ ಸ್ವಭಾವದ ಇವು ತಳಿ ನಾಷದಿಂದಾಗಿ ದಿನದಿಂದ ದಿನಕ್ಕೆ ನಮ್ಮಿಂದ ಕಣ್ಮರೆಯಾಗುತ್ತಿರುವುದು ವಿಪರ್ಯಾಸ.